اجمل قصائد الشعر الشعبي للشاعر الكبير ايهاب المالكياول قصيده ميلاد جرحي ..انه بميلاد جرحي اليوم غنيت او جبت جكليت بيدي وشمعه وحده او سهرت الليل اناطر شمعتي اتذوب اعد ساعات ليلي ودمعي اعده على ضماد الجرح طشيت جكليت او على اكتاره بدّي خليت ورده او جبت خنجر هدية عيد ميلاد وبجرحي الرطب بهداي احده كتبت اسمك ابورقه او كلت موجود اوجن اتكول صوتك يمي بعده تهمسلي واكلك وين ماوين؟ ماشفتك حبيبي صار مده؟ من يوم الرحت وعيوني لليوم طيف ابغيرشوفك ماتوده خليني الك بعده النفس بيك واذا ضدنه الوكت خنصير ضده ولا تزعل عليه اوغيضك امحيه والراح امنديك اليوم رده حبيبي ارجوك مابيه احمل اعتاب او باب الذكريات ارجوك سده تره ابلياك عمري ايام محسوب يوم براحه اعيش او يوم شده سنه ولاما نسيتك دوم علبال او غيرك من يجيني ابلحظه اصده اوكلبي لغير كلبك مارجف يوم ولو كلبك نساني اوصار نده انه وانته حبيبي وعيد ميلاد عساهه ماكضت هاي المسيه اولوادري تجيني اليوم ورتاح صدّك ماجبت خنجر هديه جاجبت العمر والروح والعين منيتهن بديك اجمل منيه حبيبي اكبال عيني وليل وشموع اواديه مافاركنهن ذني اديه هم يلفي الصبح وبغيرك اكضيه؟ اواكول البارحه جنه سويه لا ماظن بعد تتحمل الروح سنه او فوك السنه تحمل اذيه حبيبي انه ادري بيك ابغيري مهموم او ادري ابكلبك اصبح مواليه لكن موبديه الروح تهواك او تفرح من تجي وتصير يمي اوازيل اهموم عمري ابشوفتك يوم احسن بيك ماي امن اعطش اتصير او احس بمحبتك تجري ويدمي سميتك حبيبي او اغلى الاسماء ونته بكيفك شمتريد سمي بعتني ابيوم وانه امناطر اسنين وانه للحين اريدك تشتريني خلص ميلاد جرحي وخلص الليل اوبده فجر النهار اتشوفه عيني اوطفت شمعتنه ستكه والشمع ذاب اوغفه جرحي اوبده يحسب اسنيني اوبقيت الوحدي ادورك وين موجود وانه ادري ابغيابك ماتجيني اثاري الليل ذاك الراح حلمان اوخيال الجان مابينك وبيني
تسئلمن
تسئلمن علية او وين تلكاني
انه بدمع عينك صار عنواني
بعد دمي علجفك وانته بس متهوم
وبسيفك بعدهن وصل شرياني
اخذت حجايتك عن مثل باب وريح
من ذاك الوكت سديت بيباني
انه زعلان بس مو مثل زعلي الراح
مااقبل بعد ينكسر حلفاني
زرعتك بيدي صح حد ماصرت بستان
بس هسه انتهينه وجنت بستاني
انه السورت روحي بكبر سور الصين
مو طابوك جرحك حجربنياني
شسولفلك تريد ؟احجيلك شسويت ؟
بيدك شككتني شلون تقراني؟
انه بصوتي هذا المايعجك شوف
من ونيتلك بجيت جيراني
انه الشجرة العفتهه بوكت شح الماي
وجفوف الغرب كسرت عوداني
سكف روحك جنت فيك ابصدري ايصير
بردت روحك وذبيت عمداني
بعد ماحب ورد مزروع يذبل خاف
او ينكطع ممكن بيد عدواني
صح ورد الصناعي من ورق مصنوع
بس سهلة من اعوفهه وسهل ينساني
انه ميت كبل لاموت مثل الناس
بس احفظ اسراري الوكت خلاني
متت موتت شعر عد شاعر اخر س صار
لايقراني غيرة ولاهو يقراني
انه تمثال هم تنمحي بظلة نجوم
انه نحاة جرحي وصرح سواني
اشكثر مرّو ابصفي شكثر فاتت ناس
بيه تنادسو من جتف للثاني
ربك ماكطع وكفت جروحي وياي
انعه جروحي مرة ومرة تنعاني
انه شاعر ولكن عللشفته وياك
كمت اضحك بصوت بوجه ديواني
انه مملكتي كاغد واعتزلته التاج
من كامت عليه تصول فرساني
انه عدة ايام الباقيات وياي
ومنيشن مجاني وجهز دفاني
كون المثلي هسة يشوف حاله شصار
مو كاعد اكتبلك شعر وجداني
بلياك ماعيش
بلياك ماعيش اليكلك عشت
بعيوني احلفك منة تاخذ حذر
انة اطمئن يمك واذا تبتعد !
من كلشي يمي انة احس بخطر
الليل يدري شكد احبك لأن
وياك عيني تستلذ بالسهر
اذبل لحد ما ارتوي بشوفتك
جن سنبلة الروح وعشرتك نهر
بلياك كشي يصير مابيه طعم
ماميز ابين الورد والصخر
تمطر ترافة وانة اخضر غزل
وبكاع جفي قلمي يطرح ثمر
لو راد ياخذني القدر كلي الك
بس لابيني وبينك يمر قدر
علمت روحي من زغر شوفتك
ردتك صدق تبقى نقش ع الحجر
تشتاقلك عيني اذا سافرت
مثل النوارس من تحن للبحر
انه شسوي بالنظر لو رحت
من تمشي كلي حتى اضمة النظر
مادور بحبك خسارة وربح
مافكر بقلبي ربح لو خسر
كل اليهمني انة احبك فقط
حب لونة صافي ابيض من الكمر
طير انتة من مر بسمى دنيتي
وكر على روحي وعليها استقر
يسكت غصن خلقي كبل لاتجي
ينتظرك الريح التحرك الشجر
بلياك قلبي يصير مابيه نفع
شيفيد كلي الغيم البلامطر
عين الاشوفك بيها احس تختلف
مونفس عيني البيها اشوف البشر
مرات احجي صورتك ع الورق
من اخلط احساسي وي لون الصور
امشي بحياتي وامعن بخطوتك
حتى من اتيهك ع الاقل الكة اثر
انة من اعوفك جدمي يمشي بثقل
ثقل الجدام المالة من السفر
ومن تمشي عني اكون احس يختنك
والعالم بكبرة احس بيه زغر
بس لمن تردلي ارد اكتشف
كلشي بمكانه وانتة حبك كبرماردت احبك
ماردت احبك حــــــاولت
من لفظة اسمك حاذرت
جلمه وشلتهه من الحجي
من اللسان اخفيــــــــتهه
و بيبان روحي مقــــفله
وعن لا احب سديتـــــهه
صلفه امنــــياتي الرادتك
سئلتني عنك بس صمت ؟؟
كلـــــــــــش ولاحاجيتهه
كالتلي وينه ؟؟وجــاوبت
مادري مادليتـــــــــــــهه
ماردت احس حبـــك لان
كبلك الروح انطيــــــتهه
ولخاطرك رحت اعــــتذر
منيت بيهه لخاطـــــــرك
مثل الطفل ..لمن يمن بحاجته
وياك اعزناسي انتهه ...
وماكمت احس بعازته
أبدربي كلت لو مو سوه ..
امشي حياة بلادرب
يمكن يشح عني الهوه ؟
لابس جذب...
معقولة مانمشي سوه ؟؟
معقولة في لحظة الشمس
للكاع ماتتنطي ضوه ؟؟؟
وتنتهي ومانلكه صبح ؟
معقوله يطلعلي جرح ؟؟؟
معقوله ؟؟
ريشة شفتك ؟؟
ترسملي بالضحكة رمح ؟؟
لا ...موصدك
خلينا من هذا الحجي...
بجفوني سولة عللبجي
وصيادة كاعد بالجفن للدمع شايل فالته
وياي احسك جن صرت مثل الهلال وهالته
كالولك يعوفك تره ؟؟
تذكر كبل ؟؟
كتلي شكلهم ؟؟
كتلك أي.....كلهم لمن من يمي تمشي جنازته
هوانه عايشلك لان ؟
دمي الاعز مابالجسد بس انته تعرف حالته
من مايحس بلمستك
يخلص وتبقى وشالته
تذكر جنت
من تعتنيلي بدمعتك مشتاك حتى تشوفني ؟؟
وتلكاني روح مشككه ولمسات اديك تروفني
تتركني هسه قررت ؟
ينطيك كلبك ننتهي وبس بالاحلام تشوفني
تتركني هيج بلاذنب ؟
بررلي حتى لوجذب
مليت كلي كمت امل
شيحمله ليلي بوحدتي
عندك عذر ..
مليت كلي .....كمت امل
شيحمله ليلي بوحدتي
ماينحمل عدك تره
وجذبت كتلك ينحمل
كتلك لمن تمشي تره تتركني وحدي جن طفل
تايه ..
وكل اهله مشو ..
عايش ايتاني الماأجو...
كلشي اليمر يفززه ...
حتى الشماته اتفززه..
من يمشي ويهب الهوه
يلتفت حسباله حجو
لكن لمن يتذكرك
حتى الشماته ..
المابجو..
من شافو دموعه بجو
هيج آنه من عني رحت
ماتسكت جروحي ولودورتك انه بشدتي
شفتك وطن حنيت الك
لكن لكيتك غربتي
احتاريت منهن ياهي اصح
مابين ذلي وعزتي
اختاريت اعوفك حتى لا
تكسر قرار دمعتي
او ونيت سكته ماردت
يشمتون بونتي
صح اضحك بنبرة فرح
بس ركز بصوتي بعد
تسمع نحيب بضحكتي
هم مثلي كلبك مانسه
وهو بعد من تمشي درب
تذكرني خطواتك بعد ؟
تترك فراغ لخطوتي ؟
لاتسكت ال لا بينت
بين اثرهه بعبرتي
ولاتلتفتلي بس ردت
انطيك اخر مابقى وهوشبقى ؟
مني خذت كلش وبقت
دمعات ليك بذمتي
اتلاگينة
اتلاگينة او وگف كلشي بحركة الكون
بس خطواتك اوخطواتي احس بيهن
أودگ السر الأحدب وسط روحي أجراس
وفتلت اوراق الجنت طاويهن
الشارع شالنة حد ماوصلنةالغيم
وأنتحرن جروحي وچلبت بيهن
ها نتلاگة هسة وها الراح ايهون
زعلانات مني وبيك اراضيهن
وانة مابينك ومابينهن محتار
تلچمهن وگلهن بيك اداويهن
كلما تقترب جرح السنين ايطيب
يلتم والثواني خيوط اسويهن
اهي لحظات بس لمت هواي جروح
ماطابن بروحي وكل سنة اچويهن
اسولف وية روحي ها بعد خطوات
ماكلك شلون ومنو اليبديهن
منك خطوة مني ؟المهم خطوة أتصير
متهمني المسافة المهم نمشيهن
ولو محتار بس شاءت الصدفة أتصير
اشوفك والسنين الضايعة الگيهن
بس احتارمن لاحن بعيني دموع
ينتظرن شسوي احبسهن؟ ابچيهن ؟
و اردمجبور اموتهن بعين الشوك
على گد مااعبرك وارجع ارثيهن
انة احلم بالاحلام الضالات انقاظ
الم الضال منهن واحلم ابنيهن
بيت وباب وحچايات حلوة وياك
ونيران الشماتة شموع اسويهن
لاتلتفت گتلك لاوكتنة ايضيع
ميل ايعد ثواني وخطوة تمحيهن
انة تيهت روحي گلت وين تروح
يم روحك سوية وهسة نلگيهن
حلم غمضت بي عيني أوگفت وياك
بي يمك حچيت المستحي احچيهن
بجيت اوبستك ووطفيت بيك الغيض
واشتعلن ضلوعي وگتلك اطفيهن
بس فزيت وعيونك تضيع هناك
من كلش وصلنة وركزت بيهن
من مديت چف محنة جنت اتريد
اشوف اطراف اصابع ردت احنيهن
من خليتك وزعلت جدامي وياي
من گالن انريدة وردت اخليهن
انتهه كلشي وبديّ سديت باب الشوگ
وانترسن عيوني ويردن اچفيهن
ومالوليت من رادت اسراري تنام
دگ نايك بروحي گمت اغنيهن
كل عقلك
كل عقلك فرح تلكة بحلك بــي نـــاي
من تلمح عيوني راح تلـكة الـــــرد
شترجى من المكابر غير طاري الـمــوت
ومابيهـــــه المشانق غير حـــل وشد
صدكت الحجي او املت بيك احــلام
لكن مالكيتك لمن صارت جـــــد
انا ردتك تجيني بوكت بــــي شمات
جنت اسمع حجيهم من امريشـــتد
الى ان ايسوا منك ذروني ارتـــــاح
لكوغيرك وغيري والحديث انســـد
تجي هسة شبعد قصـــرت لوماجــاي
وين الكة الشماتـــــه حتـــى اكلهـــم رد
الك يد بحياتي اعـــــترف ماناســـــيك
بس انته مماتي هم الك بـــي يــــد
انه ردتك تجي الســـــــــاف الوكع تبنيه
هسه الساف سهلة بس اساسه انهـــــد
حجر عثرة الجرح حطيتة كبـــل الروح
و مأمن بجيتك راح بــي تصـــــطد
ولو حد بالبدايـــــة الك ماخـــــليت
بس حاولت تالي ردت احطـــلك حد
تريد شفاف تفرح وانه شرد انطــــــيك
اريد افرح ولكن مستحي مــن الــخد
غرك خدي دمع وشلت بي مافـــاد
اتصور فوك جفني ردت احطــن سد
جنت اسكت كبل لو هددتـــــني تروح
اخاف تروح مني عـــن زعلتـــــي ارتد
هسة انته رحت وانه من اخــــــــاف مـــنين
انه تناسيت كلشي واعتبرتــــك نـــد
شغير بيك كلبك مسـتحيل اتصـــــــير
هواللون الاسود يبقى لــون اســــود
كلما جايني جاي اقتنــع وانـــساك
وبكل امنياتي جاي احــس ازهــد
اله اسباب الزعل مو عن فراغ أيـــــــــصــير
ماصار الجزر لوما ايصــير الـــمد
نفسهن ماجبت فد شي جديد ويـــــاك
ياجرح الاشوفة عدي مـــــــنه شــــكد
وعة بيك الورد شافك شــتلت سهــــام
نايم سوة روحة حتــــــــى مايشـــــهد
واسئل جفن عيني حــتى ادينــــك بي
عن لايحجي اكله بيهه جنـــت ارمــد
اشيل ضماد جرحي تريد لاموهيــــــــــــــج؟
انته اسئلني الاول انه جرحي انشـد ؟
يستشري الحزن واستاصــلة كل يــــوم
الى ان اخبروني ان حزنك قــــــد
وصل حالة صعب منك بعـــــد ينشــال
جروحك بي مجلبــــة جـــذره بيهه امتــد
كضى وكتك مثل ما خلص وكتـــــــــي بيــوم
وين تريد احطك باب كلـبي انســد
الرذاذ ال علورد صح ندى بـــــــس لو طاح
تتغيراوصافه مو ندى ينعـــــد
بس ايجوز اذا حرا الشمس يجـــــــــــــــويه
يتبخر يجوز وللورد يصـــــــعد
علما شوف دمي ينكطــــع لو لا
من حرة صــــوابي تنطـــفي وتبرد
زين انته بقيت انـــه وراي وياك
انه مارحت عني مابقالي احـــد
موجرة مكص بس ماكو اثر جفـين
جابصمات ظلت لو بفـــــعلة يـــد
فرق يوسف بريء اتضح مـــــــن تهمو
تقنعني قميصك من دبـــر ينقــد
يوسف من لبــــس جان القميص كدار
بس انتــــــه قميصك بي زغر ماكــد
اريد اقضي بجريمة ماكوبيهه شهود
بس كلمة انساني والزعل والصـد
عندي المشكلة ابين الجرح والسيف
سيفك ؟جرحي ؟كلي يالاول هـــد
ولهذا انه كلما اوصل انطي احكام
اكول الجلسه هسه تنرفع للغـــد
روحي يمك ...
عودتهه اتحن الك مثل النوارس
من تحن بشواكهه لماي الشواطي
روحي يمك ...
وانه باقي بلايه روح سنين عايش
فاركتهه هواي من يوم العرفتك
روحي يمك ..
نجمة اول ماعرفتك
فوك ليل رموشك بود علكتهه
روحي يمك قصتي ومنين ماتقراهه هيه تصير قصه
روحي يمك ...
فرصه الك جانت وانه المامره منك خذت فرصه
ترجف جفوفي منريد اقره القصيدة
واحس بيك تشكك اوراقي الاحطهن عالمنصه
عوفني بداعت عهد وياي تبقه
مالي حيل اتملك والحيل ورقه
بيك ياسوك المشاعر كلشي صار
وموعجيبه وياك كلبي ايصير صفقه
خفت ماردت ازعلك
خفت ماردت ازعلك من نويت تروح
يمك مابجيت الدمع كضيتة
رسم حطيتلك بسمه بثواني وداع
لا مو بسمة هاي الجرح حطيتة
انه مابين بسمه ودمعه ضكت الموت
من كتلك تروح الطعم حسيتة
ولان ساعتهه احس الدمع شي ممنوع
اظن من ما وراك الدمع حبييته
جنت مامنتبهلي البسمه جانت زور
انه يوسط روحي الصخر بجيته
لان مارتك تحس بالدمع مجبور
عن صوت الجروح الدمع غضيتة
حولت الدمع يمك لنظرة شوك
وحولت المناشغ ضحك سويتة
من ساعتهه ذيج وماحجيت الصار
بس يمكن بدمعي الخبر طشيتة
زعلان بعدك
زعلان بعدك لو نهيته الزعل
لو كلي يمكن عجبتك فركتي
مالغني يم غيرك لان من اون
بس انته احسك تفتهم ونتي
فك بابكم تلكاني اثر من دمع
سويتة الك من روحتي وردتي
مابية حيل وروحي ملت ترة
تمثال اصيرن من تمر صفنتي
ها هسة يرضة وهالباجر يجي
ها ناسي يمكن هانكر عشرتي
مابين كل ذني انه ادورك جنت
بس مالكيتك وانتهت قصتي
الثلاثاء مايو 19, 2015 4:16 pm